BUTUAN CITY – Pabiling tinguha sa Caraga Conference for Peace and Development ang pagkab-ot sa tinuod og malahutayong kalinaw alang sa Mindanao taliwa nga 23 ka tuig na ang nakalabay sukad umang gihimo ang Mindanao Week for Peace niadtong tuig 1996.
Kini ang giklaro ni Caraga Conference for Peace and Development Executive Director Fr. Carlito Clase subay na sa gikatakdang pag-obserba usab sa maong kalihukan karong Huwebes Nobyem bre 28 ubos sa temang ‘Towards Human Fraternity for Peace in Mindanao.’
Sa eksklusibong pakighinabi sa Bombo Radyo Butuan, gibutyag ni Fr. Clase nga unod sa tema ang pagsundog sa gihimo ni Pope Francis kinsa mibisita sa mga Muslims countries sama sa Abu Dhabu ug Thailand aron ipa-abot sa tibuok kalibutan nga makab-ot gihapon ang kalinaw bisan og duna’y managlahing pagtuo sa relihiyon.
Alayon niini, mamahimong sentro sa nasangpit nga kasa-ulugan ang pagplastar ug pagbitay sa bag-ong lingganay kon bagtinganan sa St. James Parish nga tawgon unyang ‘Lingganay sa Kalinaw.’
Sundan kini sa ubay-ubay pang mga kalihukan apil na ang dayalogo alang sa kaangayan, pagbisita sa tribung Higaonon sa Brgy. Sta. Ana, lungsod sa Nasipit uban sa tri-people ingon man mga respresentante sa simbahang Katoliko, mga Muslimo og mga Kristiyanos.
