BUTUAN CITY – Nagmalampuson ang gipahigayon nga drug buybust operation kaganinang alas 3:00 sa hapon sa may Purok-3, Barangay Obrero ning siyudad sa Butuan diin kapin sa sien pesos nga kantidad sa gitoohang shabu ang nakumpiska gikan sa babayeng suspetsado.
Giila ang biktima nga si Edralyn Lomoyan Ello, alyas Aling 43-anyos dunay kapuyo nga lumad nga taga Villa Kananga ning dakbayan apan sa Malate, Metro Manila na nagpuyo.
Nakuha gikan sa posisyon sa suspetsado ang buybust item nga balor sa 23-mil pesos lakip na ang nasangpit nga marked money. Laing 3 pa ka sachet sa susamang kadagkoon ang nakumpiska ug lain pang 5 ka tag-as nga sachet nga gitago didto sa bra.
Lakip sa nakuha ang aluminum foil, cellphone, ug walay sulod nga sachet. Gidala na sa Butuan City Police Office ang nakuhang mga butang alang sa dokumentasyon nga laumang ipadala sa Crime Laboratory alang sa screening ug confirmatory testing.
Samtang ang dinakpan gikustudiya na usab sa maong police station alang sa tukmang disposasyon.
