BUTUAN CITY – Blangko pa ang pamilya Collantes sa rason sa paghikog sa 29-anyos nga ulitawong si Melvin Collantes sa may Purok 3, Brgy Doongan ning siyudad ning siyudad sa Butuan.
Nasayrang napalgan na lang sa iyang silingan ang biktima nga nagbitay na sa usa ka punuan duol sa iyang gipuy-ang payag.
Saysay sa inahan niining si Enecita Collantes, maayong tawo ang iyang anak ilabina kay gara-garaon kini og wala usab siya’y nasayrang duna kini naka-away. Didto matud pa kini magtulugan sa payag duol sa basakan rason nga wala siya’y nasayran nga duna kini problema.
Ang naka-apan lang sa iyang anak mao ang kanunay niining paghubog-hubog. Wala magduha-duha ang inahan nga tinuyu-an gyod sa iyang anak ang paghikog.
Ang gibating pagbalewala kon rejection gikan sa iyang pamilya ang nakitang hinungdan sa higala ni Melvin Collantes nga hinungdan sa iyang pagpakamatay.
Sa eksklusibong pakighinabi sa Bombo Radyo Butuan, gipadayag ni Genesis Saguban nga gagmay pa lang sila kanunay na kining magsulti kaniya nga mu-abot ang panahong maghikog kini.
Dako ang iyang pagtuo nga usa sa mga hinungdan niini mao gyod ang kakulang sa emosyunal nga pagtagad sa pamilya ngadto kaniya nga iyang gikahi-ubos sukad pa kaniadto tungod sa sabtunon matud pa niya nga batasan.
Gani, aron lang kini malingaw, kanunay na lang kining maghubog-hubog bahala na og wala’y kaon.
Iya pang nadumduman ang higayon dihang duna kini kahi-ubos sa iyang pamilya, didto kini natulog sa palwa sa punuan sa lubi kondiin iyang gihiktan og pisi ang iyang lawas aron lang dili mahulog.
