BUTUAN CITY – Padayon pang gipangita ang lider sa Esteve gun-for-hire group sa Surigao City nga gitumbok nga responsable matud pa sa pagpusil-patay kang Dinagat Islands provincial board member Wedefredo Olofernes.
Kini human napusilan-patay sa mga sakop sa Criminal Investigation and Detection Group kon CIDG-Caraga kaganinang sayo sa buntag ang membro sa maong grupo dihang misulay pagsukol atol sa pag-serve unta nila sa search warrant uban sa mga sakop sa Maritime Police ingon man 1st ug 2nd Provincial Mobile Force Company.
Naila ang napatay nga si Richard Solomon, 48-anyos, lumad nga taga-san Francisco, Surigao del Norte ug kasamtangang nagpuyo sa Purok 2, Sitio Toril, Barangay Luna, Surigao City.
Sa eksklusibong pakighinabi sa Bombo Radyo Butuan, gibutyag ni CIDG-Caraga regional chief Choli Jun Caduyac, nga bitbit nila ng duha ka search warrant nga gi-isyu ni RTC Judge Catalina Shineta Tare-Palacio tungod sa sumbong na kini magtinir og mga armas uban sa lider sa maong grupo nga si Julie Esteve.
Apan misulay matud pa kini pagsukol pinaagi sa pagpabuto sa iyang dalang kalibre 38 nga revolver nga ilang narekober uban sa bala, rason nga ila kining gipusil.
Dugang ni Caduyac, nakuha usab nila gikan sa pinuy-anan ni Julie Esteve kansa pila ka metro lang ang gilay-on gikan sa panimalay ni Solomon, ang usa ka 9mm caliber pistol, usa ka KG9. Usa ka kalibre .45 nga pistola, nagkada-iyang mga balaa og hand grenade.
Nakuha usab ang ID ni Esteve nga duna’ya tatak nga clerical aide sa Sangguniang Panlungsod sa Surigao City hangtud nga nakumpirma ni City Administrator Jerry Centro nga job order lang kini og natapos na ang iyang trabaho niadtong Hunyo 30 ning tuiga.
Gidugang sa opisyal nga gisugdan matud pa nila og surveillance ang maong grupo human migawas sa pakisusi sa ilang intelligence unit nga sila ang gitu-uhang gi-hire aron patyon si Olofernes.
Kabahin usab sa ilang trabaho ang pagpanulis, pagpangilog og mga yuta og uban pang kriminal nga mga binuhatan.
