BUTUAN CITY – Napatay ang 9 ka monghe nga Buddhist samtang ang mga kaubanan niini sa prosesyon ang samaron human sila gidaro sakyanan nga gimaneho sa usa ka 11-anyos nga lalaki sa Thailand.
Nagbaktas sa daplin sa karsada sa probinsya sa Mukdahan ang grupo nga gilangkoban sa 35 ka monghe ug lima ka sumusunod alang sa usa ka pilgrimage o balaang paglakaw sa dihang nahitabo ang maong aksidente.
Makita ang nagkatag nga mga saffron robe (bistidang orange) ug mga personal nga kagamitan sa daplin sa dalan, uban sa naguba nga sakyanan. Lima ka monghe ang dead on the spot samtang upat pa ang nakabsan sa kinabuhi sa ospital.
Base sa taho, gikuha sa bata ang sakyanan nga walay pananghid sa iyang mga ginikanan sa wala pa kini mawad-an og kontrol ug mibangga sa mga monghe.
Gipahayag ni Police Major General Pairoj Thaiphutsa nga padayon pa nilang gitun-an ang legal nga proseso nga ipahamtang sa maong bata nga kasamtangang giatiman sa usa ka grupo sa mga opisyal, uban ang iyang mga guardian ug doktor.
Sa inisyal nga impormasyon, nasayran nga ang maong bata duna diay special needs o kondisyon sa panghuna-huna apan wala pay dugang detalye kalabot niini.
Tungod sa maong trahedya, nanawagan karon ang Mukdahan Hospital og dinalian nga blood donation aron matabangan ang mga nangaangol nga monghe.
Sa pagkakaron, tulo ka monghe ang nagpabiling kritikal ang kondisyon samtang labing menos lima ang seryosong naangol. Ang uban gipangtambalan usab tungod sa mga minor nga samad.
