BUTUAN CITY – Naka-abot na pasado alas-tres ning hapona sakay sa usa ka flight sa Philippine Airlines ang 87 ka mga local stranded individuals kon LSIs nga gikan sa Cebu City human natanggong og pila ka semana dihang na-abtan sa enhanced community quarantine kon ECQ.
Ang maong mga LSIs gisundo sa gikomisyon nga mga service vehicles sa mga lungsod ug siyudad sa Caraga Region nga ilang gigikanan.
Sigon ni PLt. Abel Bulawan, tigpamaba sa Butuan City Police Office kon BCPO, sa maong ihap, 20 niini ang taga-Agusan del Norte nga gidala na ngadto sa provincial hospital samtang 47 usab ang mga Butuanons nga gideretso na sa quarantine facility sa Brgy. Baan Km. 3 alang sa himuon nga mga health protocols.
Sa eksklusibong pakighinabi ning sibyahan, gibutyag sa opisyal nga ipa-ilalom sila sa rapid anti-body test kondiin ang mga magpositibo sa COVID-19, ipa-ilalom sa 14 ka adlaw nga quarantine isip pagsunod usab sa health protocols sa Inter-Agency Task Force for the Management of the Emerging Infectious Diseases kon IATF-EID.
