BUTUAN CITY – Gikumpirma sa Department of Migrant Workers (DMW) nga nasamdan ang pito ka Pilipinong seafarers human naigo sa Iranian drone attack ang ilang barko nga Maltese-flagged container ship CMA CGM San Antonio.
Sigon ni DMW Secretary Hans Leo Cacdac, ang tanang pito ka Pinoy nga tripulante nakaluwas sa pag-atake apan nakahiagum og mga samad ug kasamtangang midawat og medikal nga atensiyon sa mga balay-tambalanan.
Sumala pa niini, ang upat kanila naka-angkon og minor injuries, samtang ang tulo anaa sa seryosong kahimtang ug hugot nga gimonitor.
Sa karun sumala ni Sec. Cacdac, gimonitor sa mga opisyal sa Philippine Embassy ug labor attaché ang kondisyon sa mga nasamdang Pinoy ug nakontak na ang mga niini pinaagi sa hospital authorities.
Nahitabo ang insidente samtang miagi ang barko sa Strait of Hormuz, nga kasamtangang gikonsidera isip high risk ug warlike area tungod sa tensiyon tali sa US, Israel ug Iran.
