BUTUAN CITY – Mas gipalawman pa sa kapulisan sa Cabadbaran City, Agusan del Norte ang ilang imbestigasyon sa planong pagpatay unta sa entiro pamilya Villamor pasado alas-6:40 kagabii sa may Purok 9, Brgy. Calamba sa maong siyudad.
Ang maong hitabo, mikalas sa kinabuhi sa 29-anyos nga si Joel Abuabu Jr., ug mi-angol usab sa ama-ama niining si Samson Villamor.
Sa eksklusibong pakighinabi sa Bombo Radyo Butuan, gipadayag ni PLCol. Renel Serrano, station commander sa Cabadbaran City Police Station, nga totally burnt ang balay sa pamilya Villamor human kini gidabdaban ug girakrakan sa wala pa mailang mga responsable.
Base matud pa sa saysay ni Villamor, kamulo sila og panihapon dihang gisipa og kalit ang ilang pultahan sa usa ka armadong lalaki dayong pa-arak sa dala niining armas kondiin nakita pa niyang na-intimano pagka-igo si Joel kinsa iyang giguyod uban sa iyang asawa dayong kamang uban sa lain pa nilang upat ka mga anak padulong sa kusina diin anaa’y bungbong nga semento nga maoy ilang gisalipdan.
Dihang kamulo matud pa og pa-arak ang suspek kinsa naka-change magazine pa, kamulo usab og bu-bo og gasolina sa ilang balay hangtud nga palayo na ang tira sa mga bala ug dinhi na sila nangumpas paglayat sa ilang koral padulong sa ilang mga silingan hinungdan nga tapot-lawas lang silang nakasibat.
Aminado ang opisyal nga na-trauma pa ang mga bata ug temporaryo una silang nagpuyo sa maong police station alang sa ilang kaluwasan.
Hinuon duna na sila’y duha ka mga persons of interest nga gitu-uhan nilang duna’y kalambigitan sa maong hitabo.
Kini tungod kay ning mi-aging mga buwan, siya mismo ang mi-adto sa Brgy. Calamba ug gi-settle ang problema ni Villamor batuk sa duha ka mga persons of interest nga nagbahad matud pa nga hutdon ang ilang pamilya.
Dugay na matud pa nga duna’y personal nga bangi ang biktima ug ang maong mga persons of interest.
Makig-alayon si PLCol.Serrano ngadto sa infantry battalion diin na-assign ang anak nga sundalo sa usa sa ilang mga persons of interest sa kremin higayong makakuha lang sila og gamay nga lead nga magpalig-on sa ilang pagdudang duna kini kalambigitan sa planong paglikida sa pamilya Villamor.
Sigon ni Serrano, ning nakalabay’ng tulo ka semana, naka-uli sa maong lugar ang sundalong anak sa nakabangi ni Joel Villamor ug kung duna na’y ilang makuhang lead, iyang hangyuon ang infantry battalion diin kini na-assign nga ipa-ilalom sa ballistic comparison ang iyang armas.
Kini human sila nakarekober gikan sa crime scene sukad kagabii hangtud kaganina og 18 ka mga basiyo sa 5 ka gitiro nang cartridge sa M16 armalite rifle.
Base matud pa sa pamahayag sa mga nakasaksi sa maong hitabo, usa lang ka tawo ang misulod sa balay sa mga Villamor bitbit ang taas nga kalibre sa armas samtang upat sa mga ka-ubanan niini ang anaa lang sa gawas isip mga look-out.
