BUTUAN CITY – Mukabat sa 354-mil pesos ang kantidad sa nakumpiskang 30-gramos nga gidudahang shabu gikan sa nadakpang tulo ka mga drug pushers nga gi-buy bust sulod sa Ultimate Lodge sa Brgy. Dagohoy ning siyudad sa Butuan.
Wala na maka-ipsot pa sa operasyong gihimo sa kapulisan sa Drug Enforcement Unit sa Butuan City Police Office ang mga suspek nga sila Rico Quezada, 33-anyos, ulitawo; Randy Gatollo, 35-anyos, minyo og Archie Tuyugon, 38-anyos, ulitawo pulos residente sa Brgy. Mangagoy sakop sa Bislig City sa lalawigan sa Surigao del Sur.
Gipa-ilalom na sa drug test ang mga suspek aron masuta kung migamit pa sila og shabu samtang gipa-ilalom usab sa confirmatory test ang nakumpiskang ilegal nga druga.
Gi-andam na usab ang kasong ipasaka batuk sa mga suspek ilabina ang paglapas sa Sections 5, 11, 12, og 15 sa Article 2 sa Dangerous Drugs Act of 2002.
Apil sa nakumpiska gikan sa ilang posisyon ang usa ka digital weighing scale, mga drug paraphernalia og 3 ka tag-500 pesos nga marked money. (Beth Ruiz)
