BUTUAN CITY – Giklaro sa Municipal Indigenous Peoples Mandatory Representative kon IPMR sa lungsod sa San Miguel, Surigao del Sur nga dili angayang kahadlukan ang Gingha River sa may Brgy Calatngan.
Kini human ang pagkamatay sa tulo ka mga mananagat human misulod sa langob niadtong Biernes sa gabii ug sa Sabado na narekober ang ilang patay’ng lawas human sa gihimong retrieval operation. Naila ang mga biktimang sila Partor Alvin Damalerio, Tito Bulac ug Anthon Bulac.
Nasayrang ang Gingha River, usa sa mga tourist spots sa maong lungsod ug gibansagang ‘Little Palawan’ nga ginadayo na sa mga turista kinsa usahay ang uban mag-over night pa.
Sigon ni IMPR Datu Rico Maca, nag-sesyon sila kaganina sa munisipyo ka-uban ang mga local government officials ug mga tribal leaders ug base sa ilang assessment gikan mismo sa mga residente sa maong barangay, mga mangingisda ug kadtong mga turistang nakadalikyat na sa dapit nga nahitabuan, luwas gihapon kining suruyan ug pahulayan.
Ang nahitabo matud pa sa tulo ka mga mananagat, bunga sa kakulang sa pagsiguro sa ilang kaluwasan ilabina nga nasayod matud pa sila nga usa lang ang gamay kaayong agi-anan pasulod ug paggawas sa langob diin sila napalgan, taliwa nga lapad matud pa ang sulod nga bahin.
Ang nasangpit nga langob, mao matud pa ang lugar sa nasangpit nga suba nga angayang likayan sa tanan ilabina niadtong dili pa suhito sa caving.
Grabe matud pa kalawom ang Gingha River tungod kay dihang nagsumpay siya og tulo ka kawayan ug gisukod kini, wala nila kini matugkad.
Wala matud pa damha ang nahitabo sa tulo ilabina nga gabii sila misulod sa langob aron mangisda ug pila ka oras na usab ang milabay unya wala pa sila makagawas rason nga gila-uman na ang ilang nadangatan adiser pa man ang retrieval operation nga gihimo pagka-Sabado.
