BUTUAN CITY – Tulo ka 62-footer fiber-reinforced plastic (FRP) handline fishing vessels ang gi-turn over sa Department of Agriculture–Bureau of Fisheries and Aquatic Resources (DA-BFAR) ngadto sa tulo ka fisherfolk cooperatives ug associations sa Surigao City, Surigao del Norte, ug mga lungsod sa Libjo ug Loreto, Dinagat Islands.
Ang balor ₱34.5 milyon nga proyekto ilalom sa Capacitating Municipal Fisherfolk Program, gilauman nga mabenepisyuhan sa kapin sa 500 ka municipal fisherfolks.
Ang mga modernong sakayan gidisenyo aron suportahan ang offshore handline fishing, nga mas luwas ug mas episyente kumpara sa tradisyonal nga pamaagi.
Sumala sa BFAR, pinaagi sa maong inisyatiba, gilauman nga mudako ang makuhang isda sa mga mangingisda, mu-ubos ang gasto sa operasyon, mutaas ang ilang kita, ug mapalig-on ang kaluwasan sa pagpangisda, isip kabahin sa padayon nga paningkamot sa ahensya sa pagpalambo sa sektor sa pangisda sa rehiyon.
