BUTUAN CITY – Subling miulbo ang kalayu human gi-arangkadahan sa mga bombero sa Bureau of Fire Protection kon BFP Surigao City Central Fire Station kaganinang buntag.
Unang miulbo ang kalayu bandang alas 4:56 sa buntag sa bodega sa Brgy. Washington, Surigao City nga gipanag-iyahan ni Rodrigo Quajo.
Base sa inisyal nga imbestigasyon, nag-over heat ang outlet tungod sa wala natangtang nga gi-charge nga duha ka hand held radio sukad pa kagabii.
Daling mi-arangkada ang kabomberohan diin alas 6:00 sa buntag sa dihang gideklara ang fireout.
Gane wala na mikaylap pa ang kalayu sa mga silingan niini.
Apan mibalik ang Bureau of Fire Protection (BFP) human subling mitumaw ang kalayo tungod sa nahabilin nga baga sa mga plastic sa ilalom nga wala makit-e sulod sa bodega nga maoy hinungdan sa pagkaylap pag-usab sa kalayo.
Sa karun padayon pa ang gihimong imbestigasyon aron masuta ang kantidad sa damyos nga nahatag sa maong sunog.
