BUTUAN CITY – Usa ka estudyante sa Nagoya, Japan ang nakatala og bag-ong world record human kini makamugna og pinakagamay nga humanoid robot sa tibook kalibutan.
Gikumpirma sa records keeping organization nga Guinness World Records nga si Mitsuya Tatsuhiko ang pinakabag-ong record holder sa titulong “Smallest Humanoid Robot”.
Kini human niya mamugna ang usa ka humanoid robot nga dunay kadak-ong 2.27 pulgadas nga makumpara ang kadako sa usa ka ATM card.
Si Tatsuhiko usa ka postgraduate student sa Nagoya Institute of Technology diin gitun-an niya ang robotics. Bata pa lang hilig na niini ang robotic ug sa edad nga 10-anyos, nakamugna na siya og simpleng robot nga molihok ang braso ug tiil.
Ang focus sa pagtoon karun ni Tatsuhiko ang pagmugna og gamay nga robot nga makatabang sa oras sa trahedya sama sa linog. Gusto niining makahimo og robot nga kayang makasulod sa mga gagmay nga espasyo sama sa mga nahugnong dakbalay.
