BUTUAN CITY – Nanghatag og 25 ka sako sa tag-lima ka kilong bugas ang King Multi-Purpose Cooperative Butuan City branch alang niadtong unang 25 ka mga successful blood donors.
Sigon ni branch manager Karen Estoque, taliwa sa taud-taud na nilang pagsuporta sa ingon niini nga kalihukan sa Bombo Radyo Philippines, kini ang unang higayon nga nanghatag sila og tag-singko kilos nga bugas tungod kay sa mi-aging katu-igan, cash sponsorship man lang ang ilang gi-abag uban sa libreng snacks alang sa mga successful blood donors.
Karong tuiga, gawas sa bugas, nanghatag usab sila og libreng burger ug juice sa tanang mga milambigit sa bloodletting activity sa Bombo Radyo Philippines rason nga nakakaon dili lang ang mga nakadonar og dugo kondili apil na kadtong naningkamot nga makadonar apan wala makapasar sa pag-check sa ilang vital signs.
