BUTUAN CITY – Mukabat sa 119 ka mga Locally Stranded Individuals kon LSIs nga taga-Caraga Region ang gisundo sa ginsakpan sa Land Transportation, Franchising and Regulatory Board kon LTFRB-Caraga didto sa Davao City.
Kini human unang gihatud sa maong mga personahe pagpanguna ni OIC-regional director Ma. Kristina Cassion ang 20 ka mga taga-Davao usab nga mga LSIs nga natanggong sa pipila ka bahin sa Caraga Region panahon sa lockdown nga hatud sa COVID-19 pandemic.
Sa eksklusibong pakighinabi sa Bombo Radyo Butuan, gipadayag ni RD Cassion nga ang ilang pangsunduong mga LSIs dili angayang kabalak-an tungod kay sakto kini sa mga dokumento subay sa pagsunod sa bag-ong guidelines alang sa pagsundo kanila.
Ipanghatud usab nila kini sa border control points sa mga lugar diin sila nagpuyo alang sa laing rapid test ingon man quarantine process.
Silang mga musundo apil na ang ilang gipanghatud nga mga taga-Davao nagsuot usab og mga personal protective equipment kon PPEs isip pagsunod sa health protocols.
