BUTUAN CITY – Dakong garbo sa Team CaraGold ang mga arnis ug karatedo athletes sa Ampayon Central Elementary School ning siyudad sa Butuan human nakasakmit usab og gold, silver ug bronze medals sa day 2 sa kompetisyon sa 2026 Palarong Pambansa.
Kagahapon, nakuha sa Team Caraga partikular na ni Angela Mejias sa Ampayon Central Elementary School ang gold medal alang sa arnis individual espada y daga weapon elementary girls category ug si Chinn Jo Auxtero nakakuha og bronze medal sa likhang anyo double identical weapon category ingon man unang gold medal sa arnis event.
Samtang si Rayven Maratas sa Agusan National High School nakadaog og bronze medal sa arnis likha anyo individual double weapon secondary boys category, ug si Kyle Gio Rosales, 13-anyos nga Karatedo athlete gikan sa Butuan City, nakakuha og bronze medal sa secondary category.
Kini nga mga kalampusan naghatag og dakong dungog sa rehiyon ug nagpamatuod nga daghan pang batan-ong atleta ang adunay talento ug potensyal nga makiglumba sa nasudnong lebel samtang nagpadayon pa ang ubang sporting events sa Palarong Pambansa.
