BUTUAN CITY – Padayon ang gilusad nga manhunt operation sa ginsakpan sa 29th Infantry Battalion, Philippine Army nga nakabase sa Brgy. Bad-as, lungsod sa Placer, Surigao del Norte ingon man sa mga patrol bases sa Brgy. Mayag ug Tagbayani lungsod sa Sison apil na sa Surigao del Norte Police Provincial Office batuk sa mga rebeldeng mipa-arak sa kapulisan sa lungsod sa Sison sa maong lalawigan kagahapon.
Bisan og dehado sa gidaghanon, nakabalos og tira ang kapulisan rason nga wala mulampos ang gibana-banang 15 ka mga rebeldeng New People’s Army kon NPA nga mibanhig kanila. Nasayrang usa ka pulis ug usa ka sibilyan ang angol human gipa-arakan og armas ang mobile patrol nga gikan lang nag-serve og arrest warrant sa bukirang bahin sa Barangay Mayag, lungsod sa Sison.
Ang kapulisang gipangunahan ni deputy chief of police PLt. Charlton Montero, nag-serve lang og arrest warrant nga gi-isyu ni Judge Jacqueline Ongpauco-Cortel, Presiding Judge sa RTC Branch 29 nga nakabase sa Surigao City alang kang Rene Daghayo, minyo, usa ka mag-uuma ug residente sa Purok 4, sa maong barangay tungod sa paglapas sa R.A No. 9262.
Dihang pa-uli na unta sila, gibana-banang 15 ka mga rebelde ang mitiro kanila rason nga mibalos ang kapulisan hinungdan sa 2-minutos nga engkwentro nga miresulta sa pagka-angol nila Rene Dagahoya, ang subject sa arrest warrant kinsa na-igo sa walang bahin sa iyang likod ug si Patrolman Jayson Custodio kinsa na-igo usab sa wala niyang abaga ug gidala na ngadto sa Caraga Regional Hospital alang sa medical treatment.
