BUTUAN CITY – Dose pisos lang nga minimum fare ang gi-aprubahan sa Sangguniang Panlungsod sa Butuan City sa hangyo nga minimum fare sa mga traysikol ning siyudad sa Butuan alang sa unang duha ka kilometro kansa mas ubos kaysa gipangayo sa mga transport groups.
Sa eksklusibong pakighinabi sa Bombo Radyo Butuan, gipadayag ni Reynaldo Deita, chairman sa Libertad White Transport Cooperative nga ang musunod nga kada-kilometro, dos pisos usab ang ipatong mga dugang plitehan kondiin kini nga fare rate, gibase na sa presyo sa gasolina ug kuryente ingon man sa panginahanglanon sa mga drivers.
Bisan og ubos ang na-aprubahan kay sa ilang hangyo ngadto sa City Transportation, Traffic and Management Department kon CTTMD-Butuan ning mi-aging tuig, wala matud pa kini problema alang kanila basta hipuson lang sa CTTMD ang mga kolorum nga namasayrong sakyanan aron ilang makuha ang ilang target nga kita kada-adlaw.
Aminado ang opisyal nga sa ilang chat group, mitumaw nga duna na’y nangreklamo nga mga pasahero tungod sa pagpanukot na og mas taas nga plitehan dungan sa pagklaro nga ang kasagarang mihimo niini, mao kadtong mga namasada nga kolorum nga sakyanan.
Kini usab matud pa ang usa sa mga rason nga kinahanglang hipuson sa CTTMD ang mga namasayro nga kolorum nga mga sakyanan tungod kay naghatag usab kini og dautan nga imahe kanilang duna’y mga prangkisa apil na sa city government.
