BUTUAN CITY – Padayon karun ang gihimong imbestigasyon sa kapulisan aron mailhan ang mga suspetsadong milungkab sa Department Store sa Robinson’s mall sa Brgy. Bayanihan Butuan City sa miaging kaadlawon.
Sigon ni PCol. Richie Yatar, city director sa Butuan City Police Office nga gihimo na nila ang tracking sa tulo ka mga suspetsado nga mata lang ang makita og nagbuhat og tunnel sa bakanteng kasagbutang lote dool sa mall.
Ang bangag niini deresto sa stockroom sa ground floor sa Department Store. Gilungkab sa mga suspek ang duha ka vault og nakuha ang gibana-banang 700-mil pesos nga cash og pipila ka mga merchandise ang nawad-an ug t-shirt, sling bags ug long pants nga posibling gikawat sa mga suspek.
Gibutyag pa ni Yatar nga dili mawala ang anggulo nga inside job tungod kay limited lang ang dunay access sa treasurer’s room diin didto ang vault samtang nasayud usab ang mga suspek nga walay guwardiya sa sulod sa Department Store.
Misulod matud pa ang mga suspek alas 2:00 sa kaadlawon og migawas sa alas 3:00 diin gisulayan pa nila pagguba ang ATM Machine apan napakyas ang mga niini samtang walay sulod usab nga kwarta ang Gcash Machine nga ilang giguba.
Tungod niini, gimandu sa opisyal ang pag-account sa tanang commercial area og susihon kung unsay plastada sa ilang security matag gabii aron makahimo usab sila og stratehiya.
