BUTUAN CITY – Patay ang 21-anyos nga babaye human gipusil sa usa ka lalaki sa Purok 7, Kilometer 8, Barangay Ampayon, Butuan City, pasado alas-6 sa kagabii.
Naila ang biktimang si Leah Mae Gallino Badbaran, 21 anyos, usa ka laundry attendant ug residente sa Barangay Philippine Pack, San Luis, Agusan del Sur samtang ang suspek mao si Noel “Akit” Manpinsahan, usa ka miyembro sa Armed Forces of the Philippines o AFP, nga ulahing na-assign sa Talacogon, Agusan del Sur.
Base sa inisyal nga imbestigasyon, namilo og mga labada ang biktima sulod sa usa ka laundry shop sa dihang kalit nga mi-abot ang suspek sakay sa kolor blue nga motorsiklo.
Midool matud pa ang suspek sa biktima ug gikompronta kini dayong sukna kung makigbulag ba kini kaniya ug nagpakita og armas.
Migawas ang biktima sa establisemento, apan sa wala pa matino nga hinungdan, gipusil siya sa suspek ug naigo sa dughan ug daling misibat ang suspek sakay sa maong motorsiklo.
Daling mirespondende ang ginsakpan sa Butuan City Police Station konb BCPS4 ngadto sa lugar aron mag-imbestiga ug daling gidala sa Butuan Medical Center ang biktima apan nakabsan kini sa iyang kinabuhi pasado alas-dies kagabii.
Padayon ang follow-up investigation sa kapulisan aron makatigom og dugang impormasyon dungan sa paglusad sa hot pursuit operation batok sa suspek, uban sa koordinasyon sa mga silingang police station aron mapugngan ug madakpan ang suspetsado.
