BUTUAN CITY- Nag-uli og kinatibuk-an 8 ka bulawang medalya ug usa ka silver ang PADS Adaptive Dragon Boat Racing Team human girepsentar ang Pilipinas sa gipahigayong 15th International Dragon Boat Federation Club Crew World Championships sa Taiwan.
Sa maong kompetisyon nga gipahigayon sugod Agosto 29 hangtud Setyembre 7, 2026, dili lang medalya ang nakab-ot sa grupo kundi natala usab kini og tulo ka bag-ong world records sa managlahi nga kategorya.
Sumala ni JP Maunes, team manager sa PADS Dragon Boat Team, dakong dungog alang sa ilang grupo ang pagdala pag-usab sa bandera sa Pilipinas sa internasyonal nga entablado, samtang ilang tumong nga mahimong inspirasyon sa ubang mga atletang Pilipino nga adunay kapansanan.
Sumala kaniya, bunga sa daghang bulan nga grabeng ensayo, sakripisyo, disiplina ug suporta gikan sa pamilya, coaches, partners ug supporters ang ilang maayong pasundayag.
Bisan pa sa kalisod sa matag kompetisyon, napildi nila ang mga hagit pinaagi sa panaghiusa ug dedikasyon, nga nagpamatuod nga kung hatagan og husto nga oportunidad ug igo nga suporta, ang mga atletang Pilipino nga adunay kapansanan makigkompetensya ug makadaog sa pinakadakong mga kompetisyon sa kalibotan
