BUTUAN CITY – Patay ang managsoong 28 ug 15-anyos samtang laing usa ang angol human nahulog sa pangpang sa may Purok 8, Brgy. Puting Bato, Cabadbaran City, lalawigan sa Agusan del Norte, ang ilang gisakyang motorsiklo ning mi-aging adlaw.
Unang nakabsan sa kinabuhi ang 15-anyos nga dalagitang angkas sa motorsiklong gimanehuan human gideklarang dead-on-arrival pag-abot sa ospital samtang ang iyang kuya nga si alyas Al, namatay paglabay sa pipila ka oras ug ang laing 15-anyos usab nga back rider, anaa sa talandugong kahimtang.
Nasuta nga gikan matud pa nangalito sa Tumipe cold spring sa Brgy Puting Bato sa maong siyudad ang mga biktima ug pa-uli na unta apan pag-abot nila sa dapit nga nadisgrasyahan pasado alas-5:40 sa hapon, nawad-an matud pa og brake ang motorsiklo ug dihang wala na nakontrola sa driver ang dagan niini, mideretso na kini sa pangpang hinungdan sa ilang nadangatan.
