BUTUAN CITY – Giklaro ni PMaj Dorothy Tumulak, ang tigpamaba sa Police Regional Office kon PRO-13 sa eksklusibong pakighinabi sa Bombo Radyo Butuan, nga propaganda lamang ang mga gipakatag nga leaflets sa New People’s Army kon NPA nga naglatid nga upat ka mga police officials ning rehiyon ang wanted sa ilang grupo.
Kini base sa ilang pag-monitor sa tanang kalihukan sa NPA partikular sa Surigao del Norte ug Agusan del Norte hinungdan nga nalokar sa ilang intelligence community ang nasangpit nga propaganda uban sa tabang og suporta sa komunidad aron makuha nila ang saktong impormasyon.
Ang pag-wanted sa maong mga police officials duna’y kalabutan matud pa sa pagpasaka og kasong pagpatay ug uban pa, pagpugos sa mga sibilyan nga motahan sa sabakan sa balaod tungod sa pag-abin sa walhong grupo ug uban pa.
Lakip sa wanted nga opisyal si PNP Caraga Regional Director PBGen. Romeo Caramat Jr. apan sumala ni Tumulak, tumo-tumo lamang ang maong akusasyon.
Lakip sa giklaro niini nga ang tanang mga police operations ning rehiyon, pulos lehitimo ug pinasikad sa gipagawas nga arrest ug search warrants sa korte rason nga igo lang silang nagtuman niini.
Gitawag pa usab sa opisyal nga desperado na ang walhong grupo tungod sa sunud-sunod nga pagtahan sa ilang mga kaubanan ngadto sa sabakan sa gobyerno ingon man ang pagsikop sa mga wanted sa krimen.
Gika-ingon nga ang pagsurender sa mga miyembro sa mga Militia ng Bayan, mga aktibong myembro sa NPA, ug mga dumadapig nga masa nagpamatuod nga daghan na ang nahigmata og mikontra sa walay pulos nga ideolohiya sa walhong kalihokan.-
Tungod niini, padayon ang panawagan sa kapulisan ug kasundaluhan ning rehiyon ngadto sa mga membro s teroristang grupo nga mutahan na aron maka-angkon sa mga maayong benipisyo niini ilabina nga padayon ang counter-insurgency campaign sa PNP ug AFP nga padayon pang nagtago ilalom sa balaod.
