BUTUAN CITY – Human ang kapin sa upat ka tuig nga pagtago-tago, hingpit nang nadakpan sa Brgy. Bayanihan ning siyudad sa Butuan ang suspek sa kasong murder ug frustrated murder kinsa gikutay sa pagpamusil sa Negros Occidental.
Naila ang nadakpang si Felizardo Paculanang, 40-anyos, residente sa Barangay Poblacion, Veruela, Agusan del Sur.
Nadakpan siya sa gilusad nga operasyon sa mga pesonahe sa 1304th Mobile Company sa Regional Mobile Force Battalion-13 sa may bus terminal pasado alas-singko ning mi-aging hapon base sa warrants of arrest nga gi-isyu sa 6th Judicial Region, Regional Trial Court Branch 55, nga nakabase sa Himamaylan City, Negros Occidental.
Si Paculanang ang gitudlong mipusil-patay kang Larry Garsola nga mi-angol pa sa anak niining si Sheila Mae Garsola sa Sitio Bulwang, sa Brgy. Biao, Binalbagan, Negros Occidental niadtong Pebrero 2017.
