BUTUAN CITY – Magkansela ang Vietnam og daghang flights padulong sa Pilipinas karong Mayo tungod sa taas nga presyo sa lana.
Gilantaw nga makaapekto kini sa air connectivity o abilidad sa mga tugpahanan ug airline nga magkonektar sa nagkalain-laing destinasyon sa Southeast Asian corridors.
Sa gipagawas nga pahibalo, gibutyag sa Vietnam Airlines ang pagsuspinde sa daghang flights gikan sa Manila ug Cebu padulong sa Vietnam, isip kabahin sa ilang paningkamot nga mapadayon ang kalig-on sa suplay sa lana tali sa pagsaka sa presyo.
Partikular nga kanselahon ang Cebu–Hanoi flights gikan Mayo 12 hangtod 15 ug usab sa Mayo 19 ug 20.
Gawas niini, isuspinde usab sa airline ang scheduled flights tali sa Manila ug Ho Chi Minh City sa Mayo 6 hangtod 8, 12 hangtod 14, 20 hangtod 22, ug Mayo 26 hangtod 27.
Paagtangtangon usab sa carrier ang pipila ka flights tali sa Manila ug Hanoi sa mga petsa nga Mayo 5, 12, 15, 22, 26 ug 29.
