BUTUAN CITY – Ipadayon sa Philippine Health Insurance Corporation kon PhilHealth ang pagpatuman sa 4-porsientong usbaw sa binulan nga premium contribution sa mga membro karong tuiga, base na usab sa nakalatid sa Republic Act No. 11223.
Sa eksklusibong pakighinabi sa Bombo Radyo Butuan, gipadayag ni Jane Santos, officer-in-charge sa Field Operations Office sa PhilHealth-Caraga, nga nangayo sila og clearance gikan sa Malakanyang kalabot sa pagpatuman niini karong tuiga kondiin gimanduan sila nga ipadayon kini.
Madumdumang nahunong ang staggered nga pagpatuman sa kontribusyon ning mi-aging tuig 2021 tungod sa COVID-19 pandemic aron dili madugangan ang kalisod sa panginabuhian sa katawhan.
Saysay pa ni Santos, sukad kini mi-epekto niadtong Nobyembre 2019, gisugdan gilayon ang pagpatuman sa 2.75-porsentong usbaw sa kontribusyon sa maong tuig kansa gisaka usab ngadto sa 3-porsiento pagka-2020 base na sa nakalatid sa balaud.
Dihang gi-undang ang pagpatuman niini ning mi-aging tuig, wala usa’y amiyenda nga gihimo ang Kongreso rason nga gihatagan sila og clearance sa Malakanyang nga ipadayon ang pagpatuman niini.
Gipasabot ni Santos nga wala’y laing tumong ang gobyerno pinaagi sa ilang ahensya kondili mao ang pagriyalisar sa mga giplano nang healthcare packages nga mabenepisyuhan unya, dili lang sa mga membro kondili apil na sa ilang pamilya.
Dugang pa ni Santos nga sa karon sa eskema, fixed rate ang gi-adaptar sa ilang ahensya kondiin usa lang ka sakit ang mahimo nilang bayran sa matag-membro higayong siya ma-admit.
Apan kung ma-adaptar na ang bag-ong programa ilabina ang alang drug-related group kon DRG, ang bisan unsa nga sakit unya nga makita sa usa ka higayon lang nga pagka-admit, apil usab sa bayran sa state health insurer.
