BUTUAN CITY- Misamot pa ang tensiyon tali sa Estados Unidos ug Iran human nagbinayloay og mga pag-atake ang duha ka nasod, diin si US President Donald Trump mipahimangno nga magbayad og dakong bili ang Tehran tungod sa paglangan niini sa negosasyon sa usa ka kasabutan.
Sumala ni Trump, “kompletong napildi” na ang Iran ug wala na kini’y igo nga kusog militar aron makapugong sa mga aksyon sa US. Sa pikas bahin, mingbahad usab si Iranian Foreign Minister Abbas Araghchi nga walay bisan unsang hulga o pag-atake nga dili nila baslan. Sumala sa US Central Command, ilang gitarget ang mga Iranian defense system, radar ug ground control stations duol sa Strait of Hormuz isip tubag sa pag-atake sa usa ka US Apache helicopter.
Gani mingbalos pa ang Iran pinaagi sa paglunsad og missile ug drone attack batok sa mga base militar sa US sa Bahrain ug Jordan. Bisan pa sa nagkagrabeng sitwasyon, sigon sa mga opisyal sa US nga halos tanan sa mga missile ug drone nga gilunsad sa Iran ilang nasagang ug wala’y gitaho nga namatay o nasamdan sa maong mga pag-atake.
