BUTUAN CITY – Tulo ka tawo ang on-the-spot nga patay samtang laing usa ang gidala sa ospital human nahagsa ang usa ka news helicopter sa suburban nga bahin sa Los Angeles, California.
Gikumpirma sa NBC Los Angeles nga ang nahagsang helicopter mao ang ilang NewsChopper4, nga niadto sa maong lugar aron mag-cover sa usa ka makamatay nga aksidente sa bus.
Sumala sa Los Angeles Fire Department o LAFD, nahagsa ang helicopter taliwala sa duha ka commercial building sa Chatsworth area.
Makita ang duha ka shipping containers ug pipila ka sakyanan nga nasunog ingon man ang ubang bahin sa lugar, apan gikumpirma sa fire department nga napalong na ang kalayo.
Atol sa live coverage sa NBC4, gikumpirma sa beteranang news anchor nga si Colleen Williams nga ilang news helicopter ang nahagsa.
Samtang, nagpadayag usab og pahasubo ang Los Angeles Police Department ngadto sa pamilya, mga higala ug kauban sa trabaho sa mga sakop sa KNBC 4.
Wala pa usab matino sa kapolisan kung pila ka tawo ang sakay sa helicopter sa panahon sa aksidente.
