BUTUAN CITY- Gihunong na ang gobyerno sa United States ang paghatag og pondo alang sa mga programa batok sa pagkatap sa Human Immunodeficiency Virus ug AIDS sa South Africa, diin kapin sa 8 millyon ka indibidwal ang nagkinabuhi uban sa HIV.
Gipasabot usab sa United States Department of State nga ang desisyon nalambigit sa giingong kapakyasan sa South Africa sa pagpanalipod sa minoryang Afrikaner, usa ka akusasyon nga balik-balik nang gisalikway sa maong nasud. Sumala sa US, tumong sa maong lakang ang pagpalig-on sa kaugalingong kapasidad sa South Africa ug pagkunhod sa pagsalig niini sa ayuda gikan sa Amerika.
Hangtod sa 2025, ang programa nga President’s Emergency Plan for AIDS Relief naghatag og gibanabanang $400 milyon matag tuig alang sa mga inisyatiba batok sa HIV/AIDS, apan human makabalik sa pwesto si US President Donald Trump, gipahunong sa US ang dugang nga tabang pinaagi sa usa ka executive order nga nag-akusar sa pipila ka polisiya sa South Africa nga makadaot sa patas nga oportunidad ug uban pang kontrobersiyal nga mga isyu.
