BUTUAN CITY – Hapsay sa kinatibuk-an ang unang adlaw sa filing sa Certificate of Candidacy kon COC alang sa mga mangdagan sa Barangay ug Sangguniang Kabataan elections nga gipahigayon sa SM City Butuan.
Sa eksklusibong pakighinabi sa Bombo Radyo Butuan, gibutyag ni City Election Officer Atty. Tristan Niog nga naka-contribute niini ang ilang giplastar nga lay-out nga maoy gisunod sa mga nag-file na sa ilang certificate of candidacy gikan sa entrance ngadto na sa exit.
Gipasalamatan sa opisyal ang kapulisan dili lang ning siyudad sa Butuan kondili apil sa Police Regional Office-13 tungod sa sayo nga pakig-alayon sa ilang buhatan aron masiguro ang hapsay ug malinawong filing sa ilang certificate of candidacy.
Gipasabot usab sa opisyal nga duna sila’y gihimong clustering sa mga barangay aron ma-eskedyol ang ilang pag-file apan giklaro niini nga ila gihapong i-accommodate ang wala sa eskedyol nga mga kandidato base sa ilang barangay clustering.
Nagsugod ang ilang rehistrasyon gikan ning adlawa hangtud na sa Septembre 2 gikan sa alas-otso sa buntag ngadto na sa alas-singko sa hapon gikan sa adlaw’ng Lunes ngadto sa Sabado.
Samtang gitambungan sa mga kadagkuang opisyal sa Commission on Elections kon COMELEC-Caraga ug Butuan City ang simultaneous regional and city kick-off ceremony sa mga COMELEC Checkpoints ug gun ban subay sa pagsugod na sa election period alang sa October 30, 2023 Barangay and Sangguniang Kabataan Elections nga gipahigayon sa Barangay Bancasi ning siyudad sa Butuan.
Sigon ni Atty. Ttristan Niog, present sa maong seremonyas ang mga kadagkuang opisyal usab sa kapulisan ug kasundaluhan.
Subay niini, makita na sa kadalanan ang mga COMELEC checkpoints nga maoy mususi sa mga sakyanan alang sa posibleng pagdala nila og armas kansa hugot nga gidili atol sa election period.
Gipasabot sa opisyal nga taas nga panahon ang gihatag sa Philippine National Police aron maka-apply og permit nga makadala-dala og armas gawas sa ilang pinuy-anan ang mga tawo, rason nga gitu-uhan niyang naka-apply niini ang tanan.
