BUTUAN CITY – Gipagawas na sa International Criminal Court (ICC) ang warrant of arrest batok kang Senator Ronald “Bato” dela Rosa.
Base sa impormasyon, nadawat na sa Interpol ang maong arrest warrant ug gikatahong ania na karon sa Pilipinas ang mga representante sa maong organisasyon.
Ang maong lakang kabahin sa nagpadayong imbestigasyon sa ICC kalabot sa gidumala nga “war on drugs” sa nasud kaniadto.
Sa pagkakaron, wala pa’y opisyal nga pamahayag ang kampo sa senador mahitungod sa maong report.
Sa kabahinan sa Department of Justice gibutyag ni Spokesperson Atty. Polo Martinez nga sa kasamtangan wala pay impormasyon ang buhatan mahitungod sa matud pa gipagawas nga ‘arrest warrant’ sa International Criminal Court batuk kang Sen. Bato Dela Rosa.
Bisan si DOJ Chief State Counsel Dennis Arvin Chan sa dihang nahinabi sa Bombo Radyo, gi-angkon niining wala pay kumpirmasyon mahitungod sa matud pa arrest warrant’ sa ICC.
Lakip sa gibarugan niini ang naunang posisyon nga gipaabot ang desisyon sa Korte Suprema mahitungod sa mga nag-ong-ong nga petisyon nag-kwestyon sa legalidad sa pagpadala kang Kanhe Pangulong Rodrigo Duterte ngadto sa International Criminal Court, The Hague Netherlands.
