BUTUAN CITY- Gi-aunsyo ni US President Donald Trump nga iyang ipataas gikan sa 25 ngadto sa 50 porsyento ang taripa sa mga sakyanan, trak ug auto parts nga gikan sa Canada sugod Enero 1, 2027, samtang nagkagrabe ang trade war tali sa duha ka nasod.
Ang hulga gisundan sa pagkahugno sa trade talks tali sa Washington ug Ottawa, diin ang duha ka kampo nag-akusar sa usag usa sa pagpangayo og dili makatarunganong mga kondisyon sa katapusang higayon sa negosasyon.
Gisaway usab ni Canadian Prime Minister Mark Carney ang lakang ni Trump ug dayong butyag nga daw nagtinguha ang presidente sa US nga madaot ang industriya sa sakyanan sa Canada, samtang andam ang Canada nga mobalik sa negosasyon kung adunay hustong pamaagi ang Estados Unidos.
Gipahayag usab ni Carney nga motubag ang Canada og “dollar-for-dollar” nga mga taripa sa mga produkto gikan sa US, samtang ang mga negosyo sa duha ka nasod nabalaka sa posibleng mas dakong epekto sa nagkagrabeng trade tensions.
