BUTUAN CITY- Gipasiugda sa guidance counselor nga si Ma. Jessica Quiambao ang panginahanglan nga palig-onon dili lamang ang mga polisiya kondili usab ang implementasyon ug resources alang sa mental health support sa mga pampublikong eskwelahan.
Sumala niini, bisan adunay mga polisiya alang sa comprehensive mental health services ug gisugdan na sa Department of Education ang pagkuha og school counselor associates, gikinahanglan gihapon ang hiniusang paningkamot sa mga magtutudlo, ginikanan, mental health professionals ug tibuok komunidad aron masiguro ang hustong pag-atiman sa mga estudyanteng nag-atubang og trauma o bug-at nga kasinatian.
Gi-emphasize usab ni Quiambao ang paghatag sa mga bata og luwas nga palibot, panahon sa pagproseso sa ilang kasinatian sa ilang kaugalingong dagan, pagpadayon sa ilang normal nga rutina ug sayon nga access sa mental health support kung gikinahanglan.
Samtang, sumala sa psychometrician ug guidance counselor nga si Ferina Deramos, importante ang bukas ug regular nga komunikasyon sulod sa panimalay ug eskwelahan aron sayong mailhan ang mga problema nga giatubang sa mga bata.
Sigon pa niini, dili igo ang pagpangutana kung “okay ra ba” ang bata, kondili gikinahanglan usab ang tinuod nga pagpaminaw ug pagpakigsulti aron masabtan ang ilang kahimtang. Busa, gi-awhag niini ang mga ginikanan, magtutudlo ug komunidad nga magtinabangay sa paghimo og luwas nga espasyo diin ang mga bata gawasnong makasulti, mapaminawan ug makapangayo og tabang.
