BUTUAN CITY – Gitaho sa International Organization for Independent Tanker Owners nga dako ang pagkunhod sa gidaghanon sa mga barko nga mulabay sa Strait of Hormuz tungod sa pagtaas sa tensyon sa rehiyon.
Gikan sa kasagarang mga 130 ka barko matag adlaw sa wala pa mosugod ang gubat, usa na lang ka digit ang gidaghanon sa mga barko nga mogamit sa ruta aron molabay sa maong waterway human sa balik-balik nga airstrike sa Estados Unidos ug Iran niadtong Miyerkules ug kgahapon Huwebes.
Sumala sa militar sa Estados Unidos, ilang na-target ang kapin sa 90 ka military installations sa Iran, lakip na ang pipila ka pasilidad nga duol sa Strait of Hormuz aron pahinayon ang kapasidad sa Iran sa pag-atake sa mga barko nga pang-komersyo ug mga sibilyan nga molabay sa maong parte sa katubigan.
Nakumpirma sa Iran nga dili moubos sa 14 ka tawo ang namatay sa pinakabag-ong pag-atake sa Amerika ug aduna usa’y na-igo duol sa Bushehr nuclear power plant, taliwa nga wala pa’y pamahayag gikan sa Estados Unidos bahin niini.
Isip tubag, gibutyag sa Islamic Revolutionary Guard Corps (IRGC) nga naglusad usab sila og mga pag-atake sa base militar sa Amerika sa Kuwait ug Bahrain, nga ilang gitawag nga sinugdanan pa lang sa ilang “punitive response.”
Gawas pa niini, adunay bag-ong missile attack nga ipahigayon sa Kuwait, Jordan, ug Iraq diin adunay base militar ang Estados Unidos.
