BUTUAN CITY- Mikabat na sa labing menos 752 ka tawo ang namatay ug kapin 2,500 ang gikatahong missing sa Nepal human sa kalit ug kusog nga pagbaha niadtong Miyerkules, samtang sa Tibet, China, 16 na ang opisyal nga namatay ug 546 ang gikatahong wala pa makit-i, sumala sa Chinese state media.
Hapit 20,000 ka mga security personnel ang gipakatap aron motabang sa search and rescue operations sa utlanan sa Nepal ug Tibet, apan giingon sa United Nations nga dakong hagit ang paghatod sa tabang tungod sa lisod nga terrain ug padayon nga ulan.
Samtang, gisusi sa mga awtoridad sa China ang bag-ong barrier lake nga naporma human sa landslide nga namatikdan niadtong Sabado, tungod sa kahadlok nga mahimong mosangpot kini sa laing pagbaha.
Gipasidaan sa usa ka disaster risk expert nga bisan mas gamay pa ang sunod nga baha kumpara sa unang kalamidad, mahimo gihapon kini og seryosong epekto sa mga komunidad nga apektado.
