BUTUAN CITY – Gipahibalo ni Manila Mayor Francisco “Isko” Moreno Domagoso nga adunay na’y lima ka tawo na ang namatay sa siyudad sa Manila tungod sa leptospirosis karon lang semanaha.
Sigon sa mayor, ang mga namatay natala gikan Agosto 24 nga duna’y usa ug tag-duha sa Agusto 25 ug 26.
Tungod niini, gipa-abot ni Mayor Isko ang iyang dakong pahasubo ngadto sa mga pamilya nga nawad-an sa ilang mga minahal.
Ang leptospirosis usa ka bacterial infection nga kasagarang makuha pinaagi sa pagkontak sa tubig o lapok nga kontaminado sa ihi sa mga ilaga ug uban pang mananap. Mas taas ang risgo nga matakdan niini human sa baha, ilabina kung adunay samad o garas sa panit nga ma-agian sa kontaminadong tubig.
Kung adunay history sa pagtampisaw sa tubig-baha, importante nga magpakonsulta dayon sa doktor o health center, tungod kay mahimong mograbe ang leptospirosis ug makaapekto sa kidney, atay, baga ug ubang organ sa lawas. .
