BUTUAN CITY – Gikumpirma ni Bombo international correspondent to Nepal Divina Zabala nga wala pa’y update ang Filipino community sa maong nasud kalabot sa na-missing nga Pinoy human ang lapad nga landslide kagahapon.
Naila ang biktimang si Dr. Juan Carlos Manalo, kinsa anaa sa pilgrimage sa Nepal niadtong nahitabo ang insidente.
Sa eksklusibong pakighinabi sa Bombo Radyo Philippines, gipadayag ni Zabala nga sa pagkakaron, maayo ang kahimtang sa kinabag-ang Filipino community sa maong nasud gawas lang sa usa nga na-missing.
Aminado kining nakuratan silang tanan sa kakalit sa panghitabo nga mugna sa dakong parte sa snow nga natipak ug nahulog sa lawa hinungdan usab sa debris flow nga mibanlas sa tanang mga istrakturang naagi-an niini.
Dugang pa ni Zabala, natipak matud pa ang snow, sa gabii pa nga mibara sa lawa ug sa suba ug dihang nabungkag na kini tungod sa nagpalibot nga tubig, dinhi na mibuswak ang nabara nga tubig hinungdan sa namugna niining dakong kadaut tungod sa sobra kadaghan sa tubig, lapok ug mga tipaka nga mi-igo sa tanang mga naagi-an niini.
