BUTUAN CITY- Gipakusgan sa Philippine Drug Enforcement Agency (PDEA) Caraga ang kampanya sa paghatag og saktong impormasyon ug edukasyon batok sa ilegal nga droga pinaagi sa aktibong suporta sa mga lokal nga panggamhanan.
Sumala ni Dindo Abellanosa, tigpamaba sa PDEA Caraga, dako ang ilang pasalamat sa suporta sa opisina ni Agusan del Norte Lone District Congressman Dale Corvera ug ni Governor Angel Amante, tungod kay ang pagsumpo sa ilegal nga droga nagkinahanglan og hiniusang paningkamot sa tanang ahensya sa gobyerno ug lokal nga liderato.
Lakip sa ilang mga programa ang pagpalapad sa drug awareness lectures sa mga lungsod sa Surigao del Sur, diin nasugdan na ang mga kalihokan sa Barobo ug Hinatuan ug gikatakdang ipadayon hangtod Nobyembre 5, samtang nahuman na usab ang kampanya sa napulo ka lungsod sa Agusan del Norte.
Gipasiugda ni Abellanosa nga importante ang pag-apil sa mga ginikanan ug kabataan sa maong kampanya, ilabina pinaagi sa Parents and Children Drug Educational Awareness Program tungod sumala niini, ang epektibong pagsumpo sa ilegal nga droga magsugod sa panimalay ug nagkinahanglan sa panaghiusa sa pamilya ug komunidad.
