BUTUAN CITY – Gibana-banang 15 ka mga tawo ang missing ug wala pa mahibal-i ang ilang kahimtang human sa kalit nga pagbaha sa pipila ka bahin sa Grand Canyon.
Sumala sa National Park Service o NPS, nahitabo ang flash flood mga alas-2:30 sa hapon, lokal nga oras kagahapon, sa Bright Angel Canyon ug sa palibot sa Phantom Ranch.
Sa pagkakaron, 62 na ka tawo ang giluwas pinaagi sa helicopter gikan sa maong lugar, ug gilauman nga mosunod pa ang ubang rescue operations.
Giasoy ni Nikki Baggs, 41 anyos, usa sa mga giluwas, makalilisang ang nahitabo tungod kay nindot matud pa ang panahon dihang mi-abot ang baha.
Matod pa ni Baggs, bag-o pa silang miabot sa usa ka cabin sa Phantom Ranch kauban ang duha niyang higala dihang nakahukom silang mogawas aron malingaw sa maayong panahon apan kalit silang na-abtan sa baha.
Sa dihang nagsugod ang kusog nga ulan, midagan sila padulong sa mas taas nga lugar ug didto nagpabilin base na usab sa mando sa mga park rangers kondiin naghulat sila sulod sa pipila ka oras hangtod nga na-evacuate pinaagi sa helicopter mga alas 9:30 sa gabii.
Dapat unta silang mokaon og steak dinner sa Phantom Ranch, apan matod ni Baggs, mas importante nga luwas silang nakagawas tungod sa paspas ug organisadong responde sa mga park rangers.
