BUTUAN CITY – Dili na applicable karon nga panahon ang gihiming paghusay sa tribung B’laan sa duha nila ka mga katribu nga parehong mi-angkon sa 16-ektaryang luna pinaagi sa pagsalom sa Glamang River, Barangay Anggas, Alabel, Sarangani Province, nga parehong mikalas sa ilang kinabuhi.
Sa eksklusibong pakighinabi sa Bombo Radyo Butuan, gipadayag ni Datu Rico Maca, ang Indigenous Peoples Mandatory Representative kon IPMR sa lungsod sa San Miguel, Surigao del Sur nga ang maong ritwal sa tribung B’laan, gihimo usab sa ilang tribung Manobo kaniadto apan dili pagsalom.
Gipadayag niini nga ang dili maresolbang bangi o kaso sa ilang mga ka-tribo, husayon pinaagi sa pagpabukal og tubig sa dakong kawa ug ihumol ang duha ka nagbanging tawo ug kung kinsa kadtong daghan ang malapnos nga panit, mao matud pa ang matumbok nga nakasala.
Gipadayag ni Datu Maca nga dapat gisunod unta sa mga tribal leaders ang nakakantar sa balaud ilabina sa Republic Act 8371 nga mas nailang Indigenous Peoples Rights Act kon IPRA law aron malikayan unta ang maong insidente.
Alang kaniya, mas maayong imbestigahan sa National Commission on Indigenous People kon NCIP ang tribal leader nga nagtugot niini ug tangtangon kini sa katungdanan tungod sa kawala niya mahimo ang iyang katungdanan aron mahimo untang tulay tali sa lokal nga kagamhanan ug sa maong tribo.
