BUTUAN CITY- Mingsipa na sa 5,835 ang natalang kaso sa leptospirosis sa tibuok nasud karung tuiga, sumala sa Department of Health.
Pinakadaghang kaso ang natala sa National Capital Region nga adunay 1,733, samtang adunay 632 ka kaso sa Central Luzon ug 561 usab sa Cagayan Valley.
Base sa kataposang datos sa DOH, 19% mas ubos ang kinatibuk-ang kaso kumpara sa 7,187 nga natala sa susamang panahon niadtong miaging tuig.
Ming-ubos usab ang ihap sa mga namatay, gikan sa 764 niadtong 2025 sa 385 karung tuiga.
Bisan paman, nagpasidaan ang DOH nga dili mahimong kampante ang publiko, hilabi na karun nga nagpdayon ang pagbaha sa pipila ka lugar.
Mipahimangno usab si DOH Epidemiology Assistant Secretary Gerna Manatad, nga maligo gilayon gamit ang sabon ug limpyo nga tubig ang kinsamang minglusong o na-expose sa baha.
Importante usab mga magpakonsulta gilayon aron masusi og husto ang kondisyon ug matumbok kung kinahanglan og prophylaxis o preventive medication.
Ang leptospirosis usa ka bacterial infection nga posibleng makuha sa direktang contact sa ihi og infected animals, sama sa ilaga og baboy, o sa mga lugar nga kontaminado niini, lakip ang tubig-baha.
Samtang, gilaoman usab sa Department of Education ang mga pampublikong tunghaan nga pagkusgan ang information campaign batok sa dengue ug leptospirosis.
