BUTUAN CITY – Nakatakdang susihon ugmang adlawa, Huwebes Oktubre 22, sa House Committee on Dangerous Drugs ang 521 ka kilo sa shabu nga na-intercept sa Laos ug gitakdang ipadala unta dinhi sa Pilipinas. Tumong sa pagdungog nga masusi ang mga lakang nga gihimo ug ang nagpadayong imbestigasyon sa nagkada-iyang law enforcement agencies kalabot sa maong shipment.
Sigon ni House Committee on Dangerous Drugs Chairman Rep. Mark Santos, mangayo sila og opisyal nga report gikan sa mga nag-unang ahensiya sa gobyerno sama sa Philippine Drug Enforcement Agency o PDEA, Philippine National Police o PNP, National Bureau of Investigation o NBI, ug Bureau of Customs o BOC.
Bisan pa og walay direktang hurisdiksyon ang Pilipinas sa teritoryo sa Laos, ipahigayon gihapon ang pagdungog aron makatabang sa paghan-ay og mga balaod ug pag-review sa kasamtangang mga polisiya, ilabina sa pag-monitor ug pagpakig-alayon sa mga nasod nga nalambigit sa mga international drug shipment.
Samtang, gipadayag ni Santos nga 21 na ka indibidwal ang gipadalhan og subpoena sa PNP-CIDG kalabot sa kontrobersiyal nga shipment. Padayon usab ang PDEA sa pagsusi sa posibleng koneksyon sa mga lokal nga indibidwal ngadto sa mga international drug syndicate nga mahimong nalambigit sa pagpalusot sa maong kontrabando.
Gipasiugda ni Santos nga usa sa nag-unang tumong sa imbestigasyon mao ang pag-ila kung kinsa ang nagpondo sa shipment ug kinsa ang gitakdang modawat sa ilegal nga droga sa Pilipinas, aron mapanubag ug mapasakaan og tukmang kaso ang mga responsable.
Gawas niini, gisuportahan usab sa komite ang pagpahiuli sa Inter-Agency Committee Against Illegal Drugs o ICAD ug ang paghatag og igong pondo aron mahimong hingpit nga operational ang National Anti-Illegal Drugs Task Force.
Sumala pa sa komite, pinaagi sa mas lig-on nga inter-agency task force, mapaayo ang pagpaambit sa intelligence information, regular nga coastal patrol ug hugot nga pag-monitor sa mga kahina-hinalang kargamento ug mga barko nga mosulod o mogawas sa nasud
