BUTUAN CITY- Mikabat na sa 429 ka mga lugar sa upat ka rehiyon ang gibahaan tungod sa padayon nga kusog nga ulan nga dala sa Southwest Monsoon o Habagat, sumala sa Office of Civil Defense kon OCD, diin apektado ang Ilocos Region, Central Luzon, Calabarzon ug National Capital Region.
Sigon sa OCD, miabot na usab sa 3,158 ka mga balay ang nadaot samtang dul-an 100 ka mga bahin sa dalan ug 13 ka tulay ang nagpabiling dili maagian tungod sa pagbaha ug kadaot, lakip ang duha ka tulay sa Tarlac nga naputol ug nagkinahanglan og alternatibong mga rota.
Padayon usab ang clearing operations sa mga apektadong dalan, apan adunay bag-ong mga landslide nga natala sa Subic, Zambales ug sa bahin sa Subic-Clark-Tarlac Expressway o SCTEX, diin duha ka lalaki ang namatay ug duha pa ang naangol human matabonan sa landslide sa Subic Bay Freeport Zone niadtong Sabado.
Samtang, mikunhod na ang pagbaha sa ubang bahin sa Metro Manila, apan gipaabot sa PAGASA nga magpadayon ang monsoon rains sa daghang bahin sa Luzon, ilabi na sa Ilocos Sur, Pangasinan, La Union, Benguet, Bataan, Zambales, Tarlac ug Pampanga.
