BUTUAN CITY – Gihangyo na sa prosecution team ang Senate Impeachment Court nga lugwayan ang oras sa hearing o dugangan ang mga adlaw sa impeachment trial batok kang Vice President Sara Duterte aron madali na kini.
Sumala ni House impeachment panel spokesperson Ace Barbers, gilaay na ang publiko sa hinay nga dagan sa kaso, ilabina kay nakuhaan ang mga adlaw sa hearing tungod sa mga suspensyon sa trabaho ug mga problema sa schedule sa mga testigo.
Gisugyot ni Barbers nga himoon sa mga senador ang ilang legislative work sa buntag, gikan alas-9:00 sa buntag hangtod alas-3:00 sa hapon, ug himuon ang impeachment trial pagkahuman niini.
Aron mas mapadali ang proseso, gikonsidera usab sa prosecution ang pagminus sa ilang mga testigo, ilabi na kung ang ilang mga ipangsulti halos pareho ra o balik-balik lamang.
Sigon ni Barbers, gilaay na ang mga tawo, ilabina kung ang hisgutan teknikal o legal nga mga isyu nga lisod sabton ug dugay sundon. Nanawagan usab siya sa media ug mga social media bloggers nga simplehon ug mub-on ang pagpasabot sa publiko aron dili sila mawad-an og interes sa pagsubay sa impeachment trial.
