BUTUAN CITY – Nanawagan si House impeachment team adviser ug spokesperson Ace Barbers nga lu-agan gamay ang pagpatuman sa sub judice rule sa impeachment trial batok kang Vice President Sara Duterte.
Kini human nagpagawas og ruling si Senate impeachment court Presiding Officer Sen. Francis “Chiz” Escudero, nga nagdili sa pampublikong paghisgot sa mga gipanglalisang facts, kredibilidad sa mga testigo, kgibug-aton sa mga ebidensiya, legal nga depensa o kaso, ug posibleng resulta sa pagtaral.
Matud ni Barbers, kinahanglan tugotan ang mga prosecutors nga makahatag og factual information kabahin sa mga panghitabo sa pagtaral, basta dili nila hisgutan ang merito sa kaso o mosulay og impluwensya sa mga senator-judges.
Apan, gipadayag ni Barbers nga mosunod gihapon ang House impeachment team sa mando sa impeachment court.
Gipamugos ni Barbers nga importante nga mahatagan ang publiko og husto ug klarong impormasyon bahin sa impeachment trial aron malikayan ang pagkaylap sa sayop o bakak nga impormasyon.
Dugang pa niya, kinahanglan parehas ang pagpatuman sa sub judice rule sa tanang sakop niini, lakip na ang mga senator-judges.
