BUTUAN CITY- Nasikop sa mga awtoridad ang suspek nga nailang si alyas “Ian” Lou Encantado, 41 anyos, ulitawo ug walay trabaho ug kasamtangang nagpuyo sa Purok Makugihon, Brgy. Agusan Pequeño, Butuan City. Narekober gikan sa iyang posisyon ang gibanabanang 3 ka gramo sa gituohang shabu nga nagkantidad og ₱20,400, buy-bust money nga ₱500, ug upat ka gitawag nga “literal nga bato.”
Giila sa kapulisan ang suspek isip usa ka Street-Level Individual drug personality. Sumala ni PMaj. Charles Evan Gatchalian, Hepe sa Butuan City Police Station 3, dugay na nilang gimonitor ang suspek tungod sa giingong pagpamaligya og ilegal nga droga. Dugang pa, gituohan usab nga nalambigit kini sa pagpangawat sa mga kable sa street lights sa mga lugar sa Bonbon ug Libertad, nga hinungdan sa kangitngit sa kadalanan.
Gipahigayon ang malampusong buy-bust operation ubos sa pagpanguna ni PMaj. Gatchalian kauban ang Special Drug Enforcement Unit kon SDEU team ug tibuok pwersa sa BCPS3. Sa pagkakaron, anaa na sa kustodiya sa Station 3 ang suspek samtang nag-atubang sa kasong paglapas sa Republic Act 9165 o Comprehensive Dangerous Drugs Act of 2002. Samtang, nanawagan usab ang kapulisan sa publiko nga suportahan ang mga programa sa gobyerno batok sa ilegal nga droga ug magpadayon sa pakigtambayayong aron mapugngan ang kriminalidad sa komunidad.
