BUTUAN CITY- Nadakpan na ang gitudlong suspek sa pagpamusil sa negosyante ug kanhi opisyal sa militar nga si Samuel Afdal, alas -tres hapon ning nakalabay nga adlaw.
Sumala kang Pol Col Ruben Delos Santos Provincial Director sa Agusan del Sur PNP sa pakighinabi ning sibyahan, napasakahan na og kaso si Jeffrey Mamerto, hingkod ang pangidaron, ug residente sa Purok Loring, Barangay Santa Cruz, Rosario, Agusan del Sur human nasikop pinaagi sa warrant of arrest nga gipagawas niadto pang September 2018.
Sumala kang PolCol Delos Santos nalambigit na kaniadto sa kasong murder ug frustraded murder ang suspetsado rasong nalutsan og arrest warrant.
Giklaro usab sa opisyal ang mga naggawas nga impormasyon nga wala misurrender ang suspetsado tungod kay nasikop kini sa kapulisan pinaagi sa maong warrant.
Una niini samtang ang biktimang si Samuel Afdal, naglatas sa dalan sakay sa iyang motorsiklo padulong sa iyang mining area sa Brgy. Santa Cruz, sa maong lugar, kalit lang kining gipusil sa suspek gamit ang wala pa matinong armas resulta na-ankong samad pinusilan sa parehong bukton ug paa.
Nasayrang si Afdal ang kanhi presidente sa Philsaga Mining Corporation nga sa pagkakaron duna nay laing gidumalang kompanya nga Bernster Mining nga nakabase sa maong barangay.
Nagpaayo pa ang biktima nga atua karon sa Davao City.
Samtang gibutyag sa opisyal nga generally peaceful gihapon ang probinsya sa Agunsan del Sur taliwa sa mga nagapanghitabong krimen.
Sumala kang PolCol Delos Santos isolated cases lamang ang mga krimen nga nagahatibo sa ilang probinsya og nakatutok na matod pa niini ang iyang mga sakop.
