BUTUAN CITY – Gisang-at ngadto sa House of Representatives ang usa sugyot-balaodnon nga nagtumong sa pagpalapad sa dental health services.
Sumala sa pamahayag ni Leyte 1st District Rep. Martin Romualdez Pinaagi niini nga proposal, masiguro nga ang dental services mahimong abot-kaya, dali ma-access, ug dili na usa ka pribilehiyo kondili usa ka katungod, ilabi na alang sa mga bata, buntis, ug mga senior citizen Kauban niini nga misulat sa maong balaodnon sila Tingog Representatives Yedda Marie Romualdez, Andrew Julian Romualdez, ug Jude Acidre.
Nagtumong kini nga balaod sa pagtukod og National Oral Health Program nga maglakip, taliwala sa uban, sa pag-integrate sa oral health promotion sa implementasyon sa Universal Health Care Act, Kalusugan at Nutrisyon ng Mag-Nanay Act, ug uban pang health programs sama sa nutrisyon, maternal ug child health, women’s health ug safe motherhood, kabatan-onan ug tigulang, paglikay sa panigarilyo ug droga, tubig ug sanitasyon, ug uban pa.
Sumala pa sa sugyot nga ang Philippine Health Insurance Corporation magpalapad sa ilang benefit packages alang sa oral health services para sa mga hamtong ug mga bata.
Dugang pa niini, tumong usab sa maong balaod ang paghimo og Oral Health Service ubos sa Department of Health nga maoy manguna sa paghimo og mga polisiya, pagtakda og mga sumbanan, koordinasyon, ug paghiusa sa tanang kalihokan nga may kalabutan sa oral health.
