BUTUAN CITY – Subling gipili sa parliamento sa Slovenia si right-wing politician Janez Jansa isip prime minister, human sa iyang katapusang termino nga natapos niadtong 2022.
Ang mga magbabalaod sa 90-ka miyembro nga asembliya mibotar og 51 ka pabor ug 36 ka supak kang Jansa timaan sa ka-usaban alang sa gamay nga nasud sa European Union nga bag-ohay lang gipangulohan sa usa ka liberal nga gobyerno.
Kinahanglan nga mubalik si Jansa sa parliamento sulod sa 15 ka adlaw aron ipatuman ang laing boto sa pagkompirma sa iyang umaabot nga gabinete.
Ang iyang katudluan nagtapos sa duha ka bulan nga political stalemate human sa eleksyon nga nahuman sa usa ka tie, tungod kay ang Freedom Movement ni kanhi liberal Prime Minister Robert Golob wala makamugna og parliamentary majority.
Kagahapon, si Jansa ug ang iyang populistang Slovenian Democratic Party (SDS) mipirma og coalition agreement uban sa pipila ka centre-right groups aron magtukod og bag-ong gobyerno nga karon adunay 43 ka lingkuranan sa asembliya.
Kini na ang ika-upat nga higayon nga ang 67-anyos nga si Jansa, mahimong prime minister human nangulo sa maong nasud gikan niadtong tuig 2004 hangtod 2008, 2012 hangtod 2013, ug 2020 hangtod 2022.
Sa eleksyon niadtong Marso 22, ang SDS nakakuha og ikaduhang puwesto nga adunay 28 ka lingkuranan, samtang ang Freedom Movement ni Golob nakakuha og 29 ka lingkuranan.
