BUTUAN CITY- Gihulagway ni Dr. Gerry Caño, presidente sa Asian Criminology Society, nga kulang ug hilaw ang pipila ka mga deklarasyon ni President Ferdinand Marcos Jr. atol sa iyang ikalima nga State of the Nation Address (SONA), ilabina sa mga isyu sa turismo, agrikultura, edukasyon, ug enerhiya.
Sumala niini, wala gihapon matubag ang mga dugay nang problema sa food security, mahal nga presyo sa mga palaliton, kalidad sa higher education, ug taas nga bayronon sa kuryente, samtang padayon usab ang pagsalig sa importasyon sa sektor sa agrikultura.
Gipasiugda usab ni Caño nga kinahanglan ang mas konkretong mga lakang aron mapalambo ang turismo, mapakunhod ang gasto sa elektrisidad pinaagi sa pagtangtang sa pipila ka buhis ug transmission charges, ug masulbad ang epekto sa nagkadaghang online gambling sa ekonomiya.
Alang usab niini, nagkinahanglan pa ang administrasyon og mas lig-on ug dali nga aksyon aron matubag ang nag-unang panginahanglan sa katawhang Pilipino.
Dugang pa Caño, nga possibleng dili matuman sa termino ni Pangulong Ferdinand Marcos Jr. ang saad nga wagtangon ang system loss charge sa bayranan sa kuryente.
Diin matud pa niini, posible lamang kini nga usa ka “empty promise” tungod kay ang sektor sa enerhiya sa Pilipinas kontrolado sa mga pribadong kompanya nga nag-una sa ilang negosyo ug kita.
Busa, bisan pa og tangtangon sa gobyerno ang system loss charge, nagtuo si Caño nga mangita gihapon og laing paagi ang mga power providers aron mabawi ang maong gasto, nga sa katapusan mahimong mapasa gihapon ngadto sa mga konsumidor.
